menu secteurs

Acamp confederal dels regents del 11 de mai de 2011

Intervencion de Joan-Loís BLENET, President de la Confederacion e de Joan-Francés ALBERT, delegat confederal-confederal dels regents

Avèm salvat l’ISLRF doncas APRENE
En seguida de la reforma dels IUFM e de la masterizacion, los 380 000 € allocats annalament a l’estructura devián tombar a 35 000 €. Aprèp un an e mièg de batesta los ministèris de l’ensenhament superior e l’Educacion Nacionala son a signar de convencions novèlas que mantendràn lo finançament.

L’an venent aurem pas de A1 mas i tornarem l’an d’aprèp.
Lo ministèri demandèt de tornar 7,5 pòstes a l’ISLRF (1.5 per malhum d’escòlas). Aquela decision injusta demòra d’actualitat. Organisam la resisténcia mas la negociacion serà complicada. A l’ora d’ara, las partenças a la retirada bastan pas a assegurar la perenitat del centre de formacion. Cal acceptar que d’unas negociacions sián mai longas. Las responsas rapidas son plan sovent negativas.

L’ISLRF a mai de pregorativas : aprestava al concors, aurà de mai d’aprestar a de Master 1 e 2 e segurament a porgir dins l’avenidor una licéncia per las regions ont aquela formacion manca.

Necessitat d’una lei per obligar l’Estat e las collectivitats territorialas a far.
Per l’ora, en 2008 avèm obtengut lo marcatge de la lenga dins la constitucion – es tras qu’important mas basta pas car es pas «normatiu», cal una lei per que siá oposable (la lei definís las condicions que rendon obligatòria l’accion de l’estat e de las collectivitats). E a l’ora d’ara avèm : • 2 proposicions de lei a l’amassada Nacionala • 2 proposicions al senat Desempuèi la lei Deixone en 1951 i aguèt 55 proposicions de lei – pas una es pas estada discutida. Lo 30 de junh lo senator Navarro (Lengadòc) veirà sa proposicion discutida – es istoric.

Lo 31 de març de 2012 MANIFESTACION PER LA LENGA OCCITANA a Tolosa.
Es mai qu’important que siá una capitada car patissèm d’una ataca bèla sul principi d’unitat de la lenga (exemples en Bearn e en Provença) que brolha lo messatge politic. L’unitat es menaçada bravament : L’IEO impausèt Tolosa que podián pas acceptar los Felibres. Lo Felibritge vendrà pas e la Felco vòl pas venir nimai. La pausicion de Calandreta es que devèm a tot pèrdre se batre per l’unitat que l’enjòc despassa las questions de poder entre las diferentas estructuras que son dins la Coordinacion Anem Oc. Las manifestacions son fòrça utilas, bolegan los elegits e renfortisson nòstra credibilitat.

Sèm a un moment clau : patissèm d’una ataca de la lenga fòrta dins lo sistèma public amb la Lei Fillon de 2005, avèm signat las convencions tròp tard que d’unes pensavan que caliá d’en primièr una responsa de l’Estat amb de daissar las regions faire de proposicions. D’esperar foguèt catastrofic (signatura de las convencions en 2009), que las realitats de la lei Fillon foguèron vesiblas : baissa grèva dels efectius en segondari e aquò encadena : se i a pas de mond en segondari, i a pas d’universitat, se i a pas d’universitat i a pas de regents...

2/3 del movement occitan demandan als elegits de las collectivitats de tocar pas a l’educacion...
Es un error estrategica que cal de mai en mai denonciar de la nòstra plaça. Se demandam als elegits de pas res faire a prepaus de l’ensenhament sèm segurs de la responsa. Faràn pas res, ne seràn contents e l’Estat serà pas butat a far quicòm. Avèm interès d’aver d’elegits que vòlon intervenir per parlar d’educacion.
Pagam lo prètz fòrt la manca de coeréncia del movement occitan.

Las calandretas futuras : Lanemesan, Santa Gabèla, lo collègi de Tolosa, benlèu una 3èna escòla a Tolosa e una 3èna a Besièrs. Se obtenèm un pòste la prioritat serà Milhau.