menu secteurs

Dins l’encastre de l’annada de festivitats dels 30 ans de Calandreta, la Confederacion organiza una jornada "Pòrtas dobèrtas", comuna a totes los establiments calandreta, lo 23 de genièr de 2010.

Cada establiment a la causida de las activitats e festivitats que prepausarà als visitaires tant coma de l’organizacion e de las oras de dobèrtura.

Serà l’escasença de presentar l’escòla o lo collègi, lo projècte Calandreta, de rescontrar las familhas interessadas per marcar sos enfants a Calandreta.

De mai, aqueste jorn d’aquí, a Montpelhièr, la Calandreta Candòla, qu’es tornada dins sos locals de la carrièra "Aigrefeuille" dins lo centre-vila, veirà, l’inauguracion oficiala de sos locals renovats, en preséncia de la Dòna Mandroux, conse de Montpelhièr.

Se cal sovenir qu’aqueste establiment manquèt d’èsser tancat, per rason d’insalubretat, e que dèu sa subrevida a una còla, pichòta mas determinada, de parents qu’ocupèt l’escòla a l’estiu de 2001 per empachar aquesta tancadura.

Los locals son, ara, completament renovats, mercé a la Dòna Mandroux e al Sènher Frêche que balhèt l’impulsion d’aquesta renovacion.

Aquò fa la pròva que, dins nòstras batèstas, nos cal èsser pacients, mas totjorn determinats e sens relambi.